شاعر علي قد الحال بكاش
بيحب الشعر اكمنه بلاش
ويغوص في البحر وفي الاحراش
ويصيد الحرف ميستناش
ويقوم الليل يغزل مواويل
ويحارب الغربان والخفاش
شاعر علي قد الحال مسجون
بين طلقة حبر وأن قانون
شاعر والشعر ساعات مجنون
بيعلي رايات ويدك حصون
والشعر ايات واهات وظنون
الشعر جنون
شاعر بيغني علي ليلاه
بينام ويقوم يفطر مناجاه
والبنت يا عيني مش فاكراه
بتحب الشعر ومش حباه
سيباه في طناش
شاعر والشعر ملوش لزم
بيعقد ميحلش ازمه
شاعر مشعور موزون مكسور
في الشارع مضروب بالجزمه
ولا يسوي بلاش