بــــــــلاد العم جـــــــــــاز
كتبهاعلي ابراهيم ، في 3 ديسمبر 2006 الساعة: 20:51 م
بعت الدهبات ..غلي نص قيراط
وتلات كنبات
ومسافر بكره بلاد الجاز
هعمل لكفيلي الخد مداس
وهبوس علي أيده واطاطي الراس
واعمل له عجين الفلاحه
وأخلي الشوك أناناس
وهقول يا كفيلي يا عمي
أرجوك استلطف دمي
علشان عارف وآنا راجع
هرجع ومعاي تلفاز
* * *
لا حقوله آنا كنت ف بلدي ازاي
بقعد عالقهوه وبشرب شاي
واقعد عالترعه وبمسك ناي
وأقرا الجرنان… واسمع والله موسيقي الجاز
* * *
متزغرتيش …. آنا بعت أحلامك وجيت
معلهش يامه المعذره
قومي سكي باب المندره
تعبان قوي ..آنا عايز أنام
مبقاش سفر بقي مسخره
متنوحيش
آنا مستهلش بكاكي يامه
ومستهلشي اللي جرا
ومتزعليش إذا كنت جيت
قدامي ايد ..وايد ورا
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
ديسمبر 9th, 2006 at 9 ديسمبر 2006 11:37 م
ما شاء الله .. معبر جدا
ديسمبر 10th, 2006 at 10 ديسمبر 2006 2:32 م
شكرا لك يا انسانه علي الزياره والتعليق… تحياتي