اسمي محدود الدخل

المهنه: موظف رسمي

في حكومه شديدة البخل

بصراحه مش ع الكل

عمري مليون وشويه

لو يتقاس بالاحزان

وماليش صاحب ولا خل

الحاله النفسيه : زفت وقطران علي خل

الحاله الاسريه: ام عيالي تملي

صبح وليل بتقول لي

المستور بيك عريان

لا بتهدي ولا بتضل

وهوايتي اكتب اشعار

ونهايتي هروح النار

لو مستغفرتش ربي

وساويت بين روحي وكلبي

 ورضيت بالاستحمار

وفصيلة دمي ناسيها

علشان الدم مفيش

لو كان فيه نقطه يتيمه

كانت تسالني ازاي

الامه تموت ونعيش

لكلاب السكه غنيمه

ارفع صوتك ارجوك

متكلمنيش بشويش

 بفهم في الكوره اكيد

بامارة الاهلي حديد

واعرف جونيور وريفالدو

المشهور بالتسديد

واعرف لعيبة مصر

نص المنتخب الكسر

وكمان الكابتن جوهري

ودعا الوالدين بيفيد

ناشط في الحزب الحاكم

ومتسألنيش ازاي

علشان عارفك رغاي

عايز ترميني ف توكر

حتي متقوليش باااي

حبيت الحزب الحاكم

عشان الاحزاب التانيه

مفيهاش كباية شاي!!

وعشان وعشان وعشان

الحاكم

        فيه

          مولاي